A Rede de Animais Transxénicos de Galicia (RATGA) naceu no ano 2004 como unha inciativa dun conxunto de investigadores das Universidades de Santiago de Compostela e Vigo, interesados na creación dunha serie de recursos e infraestruturas destinadas á mellora da investigación biomédica con modelos animais e, máis concretamente, con ratos modificados xeneticamente. Desde a súa creación, a rede centrouse en dous obxectivos básicos. Por unha banda, mellorar a formación dos investigadores galegos que utilizan animais de experimentación, tanto en aspectos técnicos como éticos e legais; e pola outra, crear unha serie de infraestruturas de investigación de uso común. Actualmente forman parte da rede máis de 50 investigadores pertencentes a sete grupos de investigación radicados na Universidade de Santiago de Compostela (nos campus de Santiago de Compostela e Lugo) e no Instituto de Investigacións Sanitarias de Santiago (IDIS).

Ao longo destes anos a súa actividade estivo centrada fundamentalmente en tres obxectivos fundamentais:

• En primeiro lugar, servir de nexo de comunicación entre aqueles grupos da nosa comunidade que utilizan Animais Modificados Xeneticamente (AMXs) nas súas liñas de investigación, co fin de conseguir o máximo aproveitamento dos recursos existentes, establecendo unha estratexia de traballo común que permita xerar novos recursos útiles, non só aos membros da Rede, senón tamén á comunidade científica.
• En segundo lugar, a formación no ámbito do animal de laboratorio e,
• en terceiro lugar a divulgación entre a comunidade científica e a sociedade no seu conxunto da utilizade dos modelos de patoloxías humanas baseados en animais modificados xeneticamente

Estes obxectivos concrétanse nas seguintes liñas de traballo:

• Establecemento e mantemento do Banco de Tecidos e Células
• Xeración e xestión da Unidade de Criopreservación
• Oferta de actividades de formación
• Difusión e Divulgación científica